స్వాగతం

నమస్కారం. చైతన్యం అన్న బ్లాగు పేరు చూసి అది ఈ బ్లాగులో వుంటుందనో, లేక నాకు తెగ వుందనో అనుకునేరు. నా పేరులోని చైతన్యం నాలోకి, నా బ్లాగ్ లోకి రావాలని ఆశిస్తూ ఆ పేరు పెట్టానంతే. తెలుగు బ్లాగుల గురించిన చైతన్యం నాకు చాలా మంది కన్నా ఆలస్యంగా కలిగింది. అది నా తల్లోంచి చేతుల్లోకి, దాంట్లోంచి నా మూషికంలోకి రావటానికి ఆరు నెలలు పట్టింది. ఆంధ్రులు ఆరంభ శూరులన్న నానుడికి బలం చేకూర్చటం ఎందుకని, ఖాళీ దొరికినప్పుడు మొదలెడదామని వాయిదా వేస్తూ వచ్చాను. కానీ ఖాళీ అనేది బ్రహ్మ పదార్ధమని, అది ఎప్పటికీ దొరకదని ఈమధ్యే జ్ఞానోదయమయ్యింది. అందుకే మొదలెడుతున్నా. చాలా బ్లాగుల్లా ఇది కూడా నాకు నచ్చినవి, నచ్చనివి, చదివినవి, తెలుసుకున్నవి అందరితో పంచుకోవటానికే.

ఇక నా గురించి చెప్పుకుంటే పెద్దగా ఏమి లేదు. తినటం, తొంగోవటం, దొరికిన పుస్తకాలన్ని చదవటం, కనపడ్డ సినిమాలన్ని చూడటం. ఇవి తప్ప, రావుగోపాల్ రావు చెప్పిన కళాపోషణ లాంటివేమి లేవు. తెలుగు భాష మీద అభిమానం కొంచం ఎక్కువ, తెలుగు సాహిత్యం మీద చాలా మక్కువ. అంటే సాహిత్యం గురించి తెగ తెలుసని కాదు, చదవటానికి ఇష్టపడతానని. పుట్టింది కోస్తాలో, పెరిగింది రాయలసీమలో, ప్రస్తుతం సేదతీరుతున్నది బెంగుళూరులో. ఇక మీదట నుంచి క్రమం తప్పకుండా నా ఆలోచనలు, అనుభవాలు అందరితో పంచుకోవాలని ఆశిస్తున్నాను.